كلمات اغنية الدرس انتهى
كلمات اغنية الدرس انتهى للمغنية شادية
الدرس انتهى لموا الكراريس
بالدم اللى على ورقهم سـال
فى قصـر الامم المتــحدة
مسـابقة لرسـوم الاطـفال
ايه رايك فى البقع الحمـرا
يا ضمير العالم يا عزيزى
كانت من اشـطر تلاميذى
دمها راسم زهرة
راسم رايـة ثورة
راسم وجه مؤامرة
راسم خلق جباره
راسم نـار
راسم عار
ع الصهيونية والاستعمار
وساكته على فعل الاباليس
الدرس انتـهى
لموا الكراريس
ايه راى رجـال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفـم
دم الطـفل الفـلاح
راسم شمس الصباح
راسم شـجرة تفاح
فى جناين الاصلاح
راسم تمساح
بالف جناح
فى دنيا مليانة بالاشبـاح
لكنـها قلـبها مرتــاح
وساكتة على فعل الاباليس
الدرس انتـهى
لموا الكراريس
ايه رايك يا شعب يا عربى
ايه رايك يا شعب الاحـرار
دم الاطـفال جايلك يحـبى
يقول انتـقموا من الاشـرار
ويسيل ع الاوراق
يتهجى الاسـماء
ويطـالب الابـاء
بالثـار للابـناء
ويرسم سيف
يهد الزيـف
ويلمع لمعة شمـس الصيف
فى دنيا فيها النور بقى طيف
وساكتة على فعل الاباليـس
الدرس انتهى لموا الكراريس
